للمســابــقــــــة :
قصيدة زجلية مغربية بعنوان : دير الله فبالك
.
صغاو ليا مزيان ، وسمعوني يا الأحباب
ولا تحكموا علي حتى تعرفو كاع الاسباب
شفتوني مريض وهبيل ، وماعندي صحاب
وساخط على الدنيا ومافيها من عذاب
نضحك مرة ونبكي كثير ، وماينشفو الدموع
ونحاول ننسى الهموم ، وما يعود ليها رجوع
حتى بنادم لي بغيت مابقى بغاني ولى مرفوع
وليت نتمنى فغروب الشمس ما يعود ليها طلوع
..........
هذا حال مسكين ماباغي يعيش ماباغي يموت
غادي نقول ليه زوج كلمات ، ويديرهم ساروت
البحر عامر ، ولكن حوت مايشبه حوت
إيلا عييتي ارتاح وهني راسك لا يفوت الفوت
وسير تخدم كيف الناس وماتبقاش مزموت
وابحث على بنت الناس لي تكون كالياقوت
تنسيك ماكان عندك وتفرحك بكتكوت
.........
خرج للدنيا ، تسارى فيها ، ضحك وفوج
و إيلا ماعجبك حال ارجع لدارك متوج
وحتى ايلا شفتي المرأة بدات كتعوج
الشرع عطاك أربعة ، عاود تزوج """"
...
ولا تاخدهاش وصية لا تعود مبنج
لي قالوها تعملها ،ماتسول ماتحتج
.....
ودير الله فبالك ، ماتنساه لاينساك
راه لي نساه ينساه ومايلقى غير الهلاك
والجم لسانك ،راك ماتمشي غير فين مشاك
بقلم : فاطمة نور الاسلام
الرئيسية 
البوابة 